தம்பியின் மரணத்திற்கு
காரணம்
விஷ்ணுவின் விவேகம்;
அந்த விவேகத்திற்கு
ஈடு கொடுக்க
வேண்டும் வேகம்;
உணர்ந்து கொண்டான் அண்ணன்;
வேகம் வேண்டி வேள்வி செய்தான்; மந்தார மலை சென்றான்; வரம் பெற தவம் செய்தான்; பிரம்மனைப் பணிந்தான்; விஷ்ணுவைப் பகையென எண்ணினான்; அவன் பலியே தன் பணியெனக் கருதினான்; |  |
கட்டை விரலைக்
கீழ் பதித்து
ஒரு காலில் நின்று கொண்டான்;
இரு கையையும் தலை மேல் கூப்பினான்;
முக்காலமும் முகத்தை பிரமலோகம் நோக்கி
நான்முகனை எண்ணித் தவம் புரிந்தான்;
ஐம்புலனும் அடக்கி அவன் புரிந்த தவம்
ஆறு போல் அனலைப் பொழிந்தது தேவலோகத்தில்;
ஏழேழு ஜென்மத்திலும் எவரும் செய்யமுடியாத தவம்
எட்டியது பிரம்மன் செவிக்கு;
கிட்டியது கெட்ட நேரம் புவிக்கு;
 | எதிர் வந்து நின்றான்; என்ன வேண்டுமென்று கேட்டான்; சாவதிருக்க வரம் கேட்டான்; சாத்தியமில்லை; மாற்றி யோசி என்றான் நன்றாய் யோசித்து வரம் தர வந்தவன்; |
அப்படியெனில்
மனிதனோ, மிருகமோ
உன்னால் படைக்கப்பட்டது எதனாலும்
எனக்கு அழிவு ஏற்படக் கூடாது;
வீட்டின் உள்ளே, வெளியே
எனக்கு அழிவு ஏற்படக் கூடாது;
காலையில் காரிருளில்
எனக்கு அழிவு ஏற்படக் கூடாது;
எந்த ஆயுதத்தாலும்
எனக்கு அழிவு ஏற்படக் கூடாது;
தரையில் நான் சாகக் கூடாது,
ஆகாயத்திலும் அதுபோல்
எனக்கு அழிவு கூடாது;
தவம் செய்தேன் உனக்கு
வரம் தா எனக்கு;
கேட்டான் அரக்கன்;
கொடுத்தான் பிரம்மன்;
கொடியவன் மகிழ்ந்தான்;
கொடுத்தவன் மறைந்தான்;
( பக்தி தொடரும் )
No comments:
Post a Comment