நீதியைத்தேடி

பிறந்தேன்

பின் ஓடச்சொன்னார்கள்

ஓடினேன்

பள்ளி தேடி ஓடினேன்,

கல்வி தேடி ஓடினேன்,

பணம் இறைத்து பட்டம் பெற ஓடினேன்;

*

பின் இறைத்த  பணத்தை நிரப்ப ஓடினேன்

வேலை தேடி ஓடினேன், இடையில்

சேலை தேடி ஓடினேன்.

காதல் தேடி,

கன்னியர் தேடி ஓடினேன்;

*

எல்லாவற்றுக்கும் ஒருவிலை

இன்னும் இன்னும் என்றுஓடினேன்

பல நாடுகள் பறந்தோடினேன்;

எதை எதையோத் தேடி

எங்கெங்கோ ஓடினேன்,

எல்லை மறந்து ஓடி ஆடி வாடி

இன்று அமைதியாய்;

*

இதோ என் வாழ்க்கை முடியப் போகிறது,

இத்தனை நாள் ஓடியதெதற்கு எனத்தெரியாமல்

இன்று நிற்கிறேன், திரும்பிப்பார்க்கிறேன்

வாழ்க்கை என்றால் என்ன என்றெனைக் கேட்கிறேன்;

இதற்கு நான்மட்டுமா காரணம் என்றெண்ணிப் பார்க்கிறேன்;

*

நான் ஒடினேனா என்னைத் துரத்தினார்களா

எனக்குத் தெரியவேண்டும்,

இப்பொழுதாவது உண்மை புரியவேண்டும்;

வாழ்க்கையை மறக்கச்செய்து

வாழ்வென்றால் என்னவென்று உணர்த்தாது மறைத்து

எல்லாவற்றையும் வணிகமயமாக்கி

என்னை எங்களை வாழ விடாது செய்தவர் யார் ?

*

என்னிடம் நிதி நிறைய இருக்குறது.

ஆனால் நீதி வேண்டும்.

உங்களுக்கு 
உண்மை தெரிந்தால் சொல்லுங்கள், 
இல்லை

என்பின்னே வாருங்கள்.

இதோ ...

மீண்டும் ஓடுகிறேன் ...

நீதியைத்தேடி.